Dh'fhalbh an geamhradh neo-aoigheil, 
     Dh'fhalbh am faoilteach 's an dùbhlachd, 
Dh'fhalbh aimsir na dochair 
     A thug iomadh leòn air an dùthaich; 
Thàinig sìth agus sìochaint 
     Mar thoirbheart tiodhlaic an ungaidh 
A chuireas bruansgath nan sìontan 
     Le am farpais fhiadhaich air chùlaibh.

Thàinig sìth agus saorsainn 
     'S thill aoibh agus sòlas, 
Shearg connspaid na truaighe 
     Nuair dh'fhalbh am fuachd 's a' ghaoth-reòdhta; 
Thàinig teachdair' an t-sùgraidh 
     A chuireas sunnd sean is òg oirnn, 
'S théid air dìochuimhn' gach bruaillean 
     'S bidh 'n cadal luasgain nas stòlda.

Thig bàidh agus coibhneas 
     'S thig aoibhneas gu'r n-ionnsaigh, 
Thig deàlradh na gréine 
     Thar sléibhtean is stùcan; 
Bidh ealtainn na h-iarmailt 
     A' seinn le ciatachd a' chiùil dhuinn, 
A' toirt moladh don Àrdrigh 
     A thug iad sàbhailt' troimh dhùbhlan.

Bidh cuimhn' air an fhaoilteach 
     'S air a' ghaoid rinn e fhàgail 
Fads bhios fairge nam brùchd-thonn 
     Tighinn gu tiùrra na tràghad; 
Bidh eachdraidh na deuchainn 
     Ann am briathran 'na athailt 
Mu thoiseach na bliadhn' ud 
     A leum thar crìochan na h-àbhaist.