Ar Crìoch

Se 'n cladh 's an uaigh an dachaigh bhuan, 
     Crìoch ar cuairt air thalamh - 
Sa ghainmhich fhuair, paisgte suas 
     Measg bhòrdan cruaidhe 's anairt.

Cha chluinn sinn onfhadh aig a' ghaoith 
     A' cuimhleadh feadh a' mhachair, 
Cha chluinn sinn monmhair thonn air tràigh 
     Bhon dh'fhalbh gu bràch ar caithris.

Socair sàmhach anns an ùir 
     Tha dùthchasach dha'r cnàimhean, 
Cha dèan an eunlaith le'n cruit-chiùil 
     Ar dùsgadh anns a' mhadainn.

A chuid chaidh seachran air uaigh 
     Tha doimhn' a' chuain a' falach - 
Cha bhi iad leithreachais air càch 
     Nuair théid na sgàilean seachad.