Creag nan Sealbhag

'Na suidhe balbh neo-léirsinn9each fo Éiseabhal nan stùc 
Tha charraig ghruamach gheur-bhacach fo éideadh allaidh cùmt', 
'S ge b'e có bhaist 'nad leanabas thu gun d' dhearbh e géire sùl' 
Nuair thug e Creag nan Sealbhag ort - an t-ainm a dhearbh do chliù.

An uair thig bòidhchead samhraidh ort gun tilg thu 'ghreann ud bhuat, 
Is nochdaidh tu gun d' phlanntaich thu air ais gu Bealltainn nuadh:
Beathaichidh an ùr-mhadainn gach flùr tha ort mun cuairt 
Is sgeadaichidh an t-sealbhag thu le trusgan dealbhach uain'.

Cha spìocair thu 'nad sheòmraichean, tha cùirteas pailt 'nad phàirt, 
Bidh cuirmean dhe gach seòrsa aig na h-eòin tha ort a' tàmh; 
Bidh uiseagan is smeòraichean ri ceòl sa mhadainn thràth - 
'S 'nam measg bidh guth na cuaiche tighinn air chuairt oirnn thar an t-sàil.

Tha fraoidhneas àlainn dhìtheinean air bàrr do chinn mar shròl, 
Fàsaidh fail-chuach rìomhach ort is raineach rìoghail òg; 
Bidh dris a' sreap ri d' chliathaichean gu smeur-phreasach le stòr 
'S gur tric le inntinn shuaimhneach rinn mi 'm buain an làithean m' òig'.

Ged shéideadh gaoth na h-iarmailt gu dìorrasach on tuath 
Cha ghiùlain thu còt'-ìochdair air son do dhìon on fhuachd; 
Dh'fhàg cumhachd nàdair tèaraint' thu o shìontanan gun truas 
'S ma dh'fhàg siud ann am fiachan thu gun phàigh thu riadh mar dhuais.

Tha ionaltradh aig caoraich 's crodh-laoigh a thig fo d' sgàth, 
Do choibhneas cha tig caochladh air cho fads bhios fraoch mu d' bhàrr; 
'S cho fads bhios ceò na h-iarmailt ag iadhadh ort mochthràth 
Bidh salmadair nan sgiathan mu d' sgoran ciar' a' tàmh.

Ged a thriall na nàbaidhean bha tàmhachd ort mun cuairt 
(Thug deireadh réis gu sàmhchair iad fo ùspairn sàradh cruaidh), 
Bu tric a rinn iad sùgradh gu sùrdalach mu d' bhruaich 
'S tha thusa 'n-siud mar dh'fhàg iad thu fo sgàil nan toman uain'.