Orasaigh

Air iomall fiadhaich de cheann an iardheas 
     A dh'Uibhist ghrianach mu'n iadh an sàile 
Tha 'n t-eilean ianach nan creagan ciar-chas 
     An nàbachd crìoch ri Cuan Siar nan gàir-thonn.

Ged bhios Neiptiun a' maoimeadh daonnan, 
     Cha d' chuir e gaoid 'na do chaol-dhruim làidir - 
Sheas thu suas ri gach fairge bhaoghail 
     A bhrist ri d' aodann le faochainn thàireil. 

Nam biodh na daoine a threabh gach taobh dhiot 
     'S a dh'fhiosraich gaoid ann an saothair beòshlaint 
Fad oidhche geamhraidh mun chagailt céilidh 
     Gur mì a dh'éisteadh ri sgeul an còmhraidh.

Tha lorg an t-sealgair gu pailt ri cunntadh 
     Measg chreagan ùdlaidh aig tiùrr do chòrsa - 
Is iomadh diùnlaoch le ghunna dùbailt' 
     A choisich sunndach a-null an dòirlinn.

Nan d'fhuair thu tàlann gu bruidhinn Gàidhlig 
     Bhiodh eachdraidh chàirdeil le bàidh 'nad chòmhradh; 
Gur pailt an t-Hàllann tha ùir is cnàmhan 
     Nam fuireann làidir bha snàmh mu d' òban.

Tha tràigh de ghainmhich air dhath an airgid 
     Is bàigh tha ainmeil le dealbhach' bòidhche; 
Do mhullach cruthail air chumadh dùn-lios 
     Fo chuibhrig fhlùran 's an driùchd gan òradh.

An àm an t-samhraidh bidh crònan tìoma 
     Aig toiseach lìonaidh a' tighinn gu d' chòrsa, 
'S an àm a' gheamhraidh aig toiseach tràghaidh 
     Bidh nuallain làstail aig gairge bhòc-thonn.

Ri stoirm an fhaoiltich bidh 'n fhairg' 'na taom-bhoil 
     A' gleacadh faobhair ri d' aodann gròbach; 
A dh'olc na dh'éiginn cha d'rinn thu géilleadh, 
     'S cha d' ghluais do stéidh ri séideadh Aeòlus.

Tha ealtainn sgèimheach mu d' sgorran iom-sgoilt', 
     Thu dhaibh 'nad dhìon-àit' bho shìontan fògairt; 
Bidh ròn gu h-uallach air bhàrr nan stuadh-ghlas - 
     Tha 'n tìr 's an cuan ann an dual a bheò-bhith.

Bheir àm h-Éill Pàdraig dhut trusgan àraidh, 
     Bidh brat de bhlàthan 'nan àill gad chòmhdach 
Bidh ceòl na cuaiche ga mheasg ri suaimhneachd, 
     Is thig luchd cuairt thar a' chuain gad fheòrachd.